អ្នកចាប់ផ្តើមភាគច្រើនជួបការលំបាក
មិនមែនដោយសារការសរសេរកូដវាពិបាកហួសពីសមត្ថភាពនោះទេ
តែពួកគេពិបាក ដោយសារតែមិនដឹងថាគួរផ្ដោតលើអ្វីឱ្យប្រាកដ។

នៅពេលអ្នកចាប់ផ្តើមរៀនផ្នែកព័ត៌មានវិទ្យា ឬវិស្វកម្មព័ត៌មានវិទ្យានៅសាកលវិទ្យាល័យ មិនថាអ្នករៀនភាសា C, C++ ឬ Python នោះទេ អ្នកច្បាស់ជាមានអារម្មណ៍ថាពិបាក ព្រោះវាមានមេរៀនច្រើន បញ្ហាច្រើន និងមាន Software Tools ជាច្រើនដែលត្រូវប្រើក្នុងពេលតែមួយ។
ចំណុចនេះហើយដែលធ្វើឱ្យអ្នកព្យាយាមរៀន "គ្រប់យ៉ាង"។
ហើយនោះគឺជាកំហុសដ៏ធំបំផុត។

១. ចាប់ផ្តើមពីមូលដ្ឋានគ្រឹះ

មិនថាអ្នករៀនភាសាអ្វីក៏ដោយ គោលគំនិតស្នូលរបស់វាគឺដូចគ្នាទាំងអស់។ ចូរផ្ដោតលើ៖

• Variables: ការប្រកាសអថេរ
• Data types: ប្រភេទនៃទិន្នន័យ
• Conditions (if/else): លក្ខខណ្ឌ
• Loops: ការរង្វិលជុំ
• Functions: មុខងារនៃកូដ

ទាំងនេះគឺជា "ដុំឥដ្ឋ" សម្រាប់សាងសង់កម្មវិធី។ បើអ្នកយល់ពីវាច្បាស់ អ្នកមិនមែនគ្រាន់តែរៀនចេះភាសាមួយនោះទេ គឺអ្នកកំពុងរៀនពី "របៀបដែលកម្មវិធីកុំព្យូទ័រដំណើរការ"។

២. ភាសាដំបូងដែលអ្នករៀន មិនសំខាន់ដូចអ្នកគិតនោះទេ

នៅសាកលវិទ្យាល័យមួយចំនួនដូចជាសាកលវិទ្យាល័យភូមិន្ទភ្នំពេញ (RUPP) ជាដើម និស្សិតច្រើនតែចាប់ផ្តើមជាមួយភាសា C ឬ C++។
វាមិនមែនជារឿងអាក្រក់ឡើយ។ ទោះបីវាហាក់ដូចជាពិបាកនៅពេលដំបូង ប៉ុន្តែវាបង្ខំឱ្យអ្នកគិតឱ្យបានស៊ីជម្រៅពីរបៀបដែលកូដដំណើរការជាមួយម៉ាស៊ីន។
នៅពេលក្រោយមកទៀត នៅពេលអ្នកប្តូរទៅរៀន Python វានឹងក្លាយជារឿងងាយស្រួលបំផុត ព្រោះគោលគំនិតគឺដដែល អ្វីដែលប្លែកមានតែរបៀបសរសេរ (Syntax) ប៉ុណ្ណោះ។

៣. កុំដេញតាមភាសាកូដ

អ្នកចាប់ផ្តើមភាគច្រើនតែងតែគិតថា៖

"ខ្ញុំគួរតែរៀន Python..."
"ទេ! រៀន Java ល្អជាង..."
"ឬក៏ JavaScript មានប្រយោជន៍ជាង?"

ការគិតបែបនេះនឹងធ្វើឱ្យអ្នកកាន់តែយឺត។ ជំនួសឱ្យការដូរភាសាចុះឡើង ចូររៀនឱ្យស៊ីជម្រៅលើភាសាណាមួយឱ្យច្បាស់៖

• រៀនយល់ពីរបៀបដែល Function ដំណើរការ។
• យល់ពីរបៀបដែលទិន្នន័យឆ្លងកាត់កម្មវិធីរបស់អ្នក។
• ហាត់ដោះស្រាយបញ្ហា
  កាលណាអ្នកយល់ចំណុចទាំងនេះហើយ ការរៀនភាសានៅថ្ងៃក្រោយនឹងចំណាយពេលត្រឹមតែប៉ុន្មានថ្ងៃប៉ុណ្ណោះ។

៤. ផ្ដោតលើការ "គិត" មិនមែនលើការ "វាយអត្ថបទ"

ការសរសេរកូដ មិនមែនជាការទន្ទេញចាំមេរៀនដើម្បីយកមកវាយបញ្ចូលក្នុងកុំព្យូទ័រនោះទេ។ វាគឺជាការដោះស្រាយបញ្ហា។
អ្នកអាចស្រាវជ្រាវរក Syntax ក្នុង Google បានគ្រប់ពេល ប៉ុន្តែបើអ្នកមិនយល់ពី Logic អ្នកនឹងគាំងមិនខាន។
ដូច្នេះ នៅពេលអ្នករៀន ចូរសួរខ្លួនឯងថា៖

• តើបញ្ហានេះគឺជាអ្វី?
• តើខ្ញុំអាចបំបែកវាជាជំហានតូចៗដោយរបៀបណា?
• តើកម្មវិធីគួរធ្វើអ្វីមុនគេ?
  នេះទើបជាការសរសេរកូដពិតប្រាកដ។

៥. រក្សាភាពងាយស្រួល

អ្នកមិនចាំបាច់បង្កើត Project ធំៗភ្លាមៗនោះទេ។

• សរសេរកម្មវិធីតូចៗឱ្យបានច្រើន។
• អនុវត្តឱ្យបានញឹកញាប់។
  ទាំងនេះហើយគឺជាវិធីដែលធ្វើឱ្យអ្នកពូកែ។

អ្នកសរសេរកូដជាច្រើន តែងតែចាប់ផ្តើមដោយភាពស្រពិចស្រពិលដូចគ្នា។

បើអ្នកផ្ដោតលើមូលដ្ឋានគ្រឹះឱ្យរឹងមាំ អ្វីៗផ្សេងទៀតនឹងក្លាយជាងាយស្រួល។ ហើយនៅថ្ងៃអនាគត ការប្តូរភាសាកូដនឹងមិនមានអារម្មណ៍ថាត្រូវចាប់ផ្តើមពីសូន្យឡើយ តែវាគឺជាការរៀនវិធីថ្មី ដើម្បីបង្ហាញពីគំនិតចាស់ដែលអ្នកមានរួចជាស្រេច។